​កូរ៉េខាងត្បូង អំពាវនាវ​ឲ្យពលរដ្ឋ​២,៥លាននាក់ កុំចាកចេញពីក្រុង ដើម្បីការពារខ្លួនពីមេរោគ​COVID-19
ព័ត៌មានអន្តរជាតិ
241

បរទេស៖ ប្រទេសកូរ៉េខាងត្បូង បានរាយការណ៍ពីការស្លាប់ដំបូងរបស់ខ្លួនពីវីរុសថ្មីនេះកាលពីថ្ងៃព្រហស្បតិ៍សប្តាហ៍នេះ ខណៈដែលអភិបាលក្រុងដេគូ (Daegu) ភាគអាគ្នេយ៍នៃប្រទេស បានជំរុញឱ្យប្រជាជនចំនួន​២,៥​លាននាក់របស់ខ្លួន​ផ្អាកការធ្វើដំណើរចេញទៅក្រៅក្រុង ដើម្បីបង្ការកុំឲ្យឆ្លងមេរោគ COVID-19 ខណៈ​អ្នកឆ្លងកើនដល់​១០៤ករណី។ នេះបើយោងតាមការចេញផ្សាយ​ដោយសារព័ត៌មាន New York Post ​នា​ថ្ងៃព្រហស្បតិ៍ ទី២០ ខែកុម្ភៈ ឆ្នាំ២០២០។

អភិបាលក្រុង Daegu លោក ក្វុន យាំងជីន (Kwon Young-jin) បានធ្វើការអំពាវនាវដូចខាងលើនេះ នៅក្នុងសន្និសីទសារព័ត៌មានមួយ បន្ទាប់ពីបណ្តាទីក្រុងមួយចំនួនក្បែរៗទីក្រុង Daegu បានរាយការណ៍ពីករណីឆ្លងថ្មីៗរាប់សិបករណីបន្ថែមទៀត នៅក្នុងថ្ងៃព្រហស្បតិ៍នេះ រួមទាំងនៅក្នុង Daegu ផងដែរ។

អាជ្ញាធរសុខាភិបាលកូរ៉េខាងត្បូងបានគូសបញ្ជាក់ថា មនុស្ស ២៨នាក់ក្នុងចំណោម អ្នកឆ្លងមេរោគ COVID-19 ថ្មីៗសរុប ៣៥នាក់នៅក្នុងថ្ងៃព្រហស្បតិ៍នេះ គឺពួកគេធ្លាប់មានប្រវត្តិចូលរួមក្នុងពិធីសាសនា នៅព្រះវិហារគ្រិស្តមួយដែលអ្នកជំងឺ COVID-19 ម្នាក់ក៏ត្រូវបានគេដឹងថា ក៏ធ្លាប់ទៅកាន់ទីនោះពីមុនមកផងដែរ។ ទីក្រុង Daegu ស្ថិតនៅក្នុងខេត្តគ្យុងសាងខាងជើង ( North Gyeongsang) នៃភាគអាគ្នេយ៍ប្រទេសកូរ៉េខាងត្បូង។

គួរបញ្ជាក់ថា បច្ចុប្បន្នជំងឺឆ្លង COVID-19 បានផ្តាច់ជីវិតមនុស្សម្នាក់ នៅកូរ៉េខាងត្បូង និងការឆ្លងវិញបានកើនឡើងដល់ ១០៤ករណី។ ក្រៅពីចិនដីគោក ប្រទេសជប៉ុន អ៉ីរ៉ង់ បារាំង កោះតៃវ៉ាន់ ហុងកុង និងហ្វលីពីនជាដើមក៏បានអះអាងពីករណីស្លាប់ ដោយសារមេរោគឆ្លង COVID-19 ផងដែរ ហើយពេលនេះ គឺបូកថែមកូរ៉េខាងត្បូងមួយទៀត៕