បុរសម្នាក់ តចរន្តអគ្គិសនីទៅឆក់ត្រីមិនប្រយ័ត្ន បណ្តាលឲ្យឆក់ខ្លួនឯងស្លាប់យ៉ាងអាណោចអាធ័ម
ព័ត៌មាន
185

កណ្ដាល៖ ផ្អើលទាំងព្រឹកដោយយុវជនម្នាក់ តចរន្តអគ្គិសនីចេញពីផ្ទះ ដើម្បីឆក់ត្រីនៅក្នុងទឹកខាងជើងផ្ទះ មិនប្រយ័ត្នបែជាឆក់ខ្លួនឯងស្លាប់យ៉ាងអណោចអធ័ម ។ 

ហេតុការណ៍នេះបង្កការភ្ញាក់ផ្អើលឡើងនៅវេលាម៉ោង៦និង៣៥នាទីព្រឹកថ្ងៃទី១៤ ខែកុម្ភៈ ឆ្នាំ២០២០ ស្ថិតនៅភូមិទួលស្រម៉ ឃុំពើក ស្រុកអង្គស្នួល ខេត្តកណ្តាល។

យុវជនរងគ្រោះឈ្មោះ ភ័ណ្ឌ សុភុត ភេទប្រុស អាយុ២០ឆ្នាំ សញ្ជាតិខ្មែរ មុខរបរបើកបររថយន្ត មានទីលំនៅភូមិអង្គស្នួលទី២ ឃុំពើក ស្រុកអង្គស្នួល ខេត្តកណ្តាល។

មន្ត្រីនគរបាលផ្នែកកោសល្យវិច្ច័យស្រុកអង្គស្នួលបានឲ្យដឹងថា តាមការសួរបំភ្លឺរបស់ម្តាយជនរងគ្រោះឈ្មោះ សោម សំអឿន អាយុ៥៤ឆ្នាំ បានប្រាប់ឲ្យដឹងថា កាលពីម្សិលមិញ នៅថ្ងៃទី១៣ ខែកុម្ភៈ ឆ្នាំ២០២០ វេលាម៉ោង៨និង៣០នាទី ជនរងគ្រោះជាកូន បានហូបបាយរួច ហើយក៏ចេញពីផ្ទះទៅបាត់ទៅ មិនដឹងទៅណាទេ រីឯខ្លួនជាម្ដាយ ចូលដេកបាត់ដែរ ។ រហូតដល់ម៉ោងប្រហែល១និង១០នាទី ឈានចូលថ្ងៃទី១៤ ខែឆ្នាំដដែល ខ្លួនជាម្ដាយ ក៏ងើបឡើងឃើញខ្សែរភ្លើងដោតជាប់នឹងឌុយដែលនៅជិតខ្លួននោះ ពេលនោះក៏នឹកឃើញថាប្រហែលជាកូនដោតឆក់ត្រី ក៏ដកខ្សែភ្លើងចេញ ហើយដើរតាមខ្សែរភ្លើងមើលទៅឃើញកូនខ្លួនដួលនៅក្នុងទឹកស្រែនោះក៏លើកឡើងអត់ដឹងខ្លួនសោះ ក៏ស្រែកហៅបងប្អូនឲ្យមកជួយលើកឡើងមកផ្ទះធ្វើចលនានៅតែអត់ដឹងខ្លួនទេរួចរាយការណ៍ទៅប៉ុស្តិ៍រដ្ឋបាលពើក ដើម្បីធ្វើការពិនិត្យ ។

ក្រោយមកសមត្ថកិច្ចប៉ុស្តិ៍ រាយការណ៍បន្តទៅផ្នែកពិនិត្យ វិភាគកន្លែងកើតហេតុស្រុកអង្គស្នួល បានចុះមកដល់កន្លែងកើតហេតុ បានធ្វើការពិនិត្យ ឃើញថា ជនរងគ្រោះពិតជាស្លាប់ដោយសារឆក់ចរន្តអគ្គិសនីប្រាកដមែន ។ សាកសពជនរងគ្រោះ ត្រូវបានសមត្ថកិច្ចប្រគល់ជូនក្រុមគ្រួសារជនរងគ្រោះយកទៅធ្វើបុណ្យតាមប្រពៃណី ៕