​កុំភ្លេចណាយប់នេះហើយ​! U22​កម្ពុជា ប៉ះវៀតណាម វគ្គពាក់កណ្ដាលផ្ដាច់ព្រ័ត្រ SEA Games​

ការទន្ទឹងរង់ចាំរបស់អ្នកគាំទ្រកម្ពុជាបានមកដល់ទៀតហើយ ក្រុមបាល់ទាត់ជម្រើសជាតិអាយុក្រោម ២២ឆ្នាំកម្ពុជា នឹងត្រូវជួបក្រុមជម្រើសជាតិ U22 វៀតណាម ក្នុងវគ្គពាក់កណ្ដាលផ្ដាច់ព្រ័ត្រនៃព្រឹត្តិការណ៍កីឡាស៊ីហ្គេម(SEA Games) លើកទី៣០ នៅទីក្រុងម៉ានីល ប្រទេសហ្វីលីពីន នាម៉ោង ៧ម៉ោងយប់នេះ(ម៉ោងនៅកម្ពុជា) ។

ការប្រកួតដ៏កម្រនេះ បានទទួលការចាប់អារម្មណ៍យ៉ាងខ្លាំងពីអ្នកគាំទ្រកម្ពុជា ក៏ដូចជាអ្នកគាំទ្រវៀតណាម ដ្បិតនេះគឺជាលើកដំបូង ដែលក្រុមទាំងពីរបានជួបគ្នាក្នុងវគ្គពាក់កណ្ដាលផ្ដាច់ព្រ័ត្រ។ កម្ពុជា និងវៀតណាម ធ្លាប់ជួបគ្នា ៣លើកមកហើយ ក្នុងវគ្គជម្រុះតាមពូល នៃព្រឹត្តិការណ៍នេះ ដោយកម្ពុជាបានបរាជ័យទាំង ៣ប្រកួត ពោលគឺឆ្នាំ១៩៩៥ ចាញ់ ៤-០, ឆ្នាំ២០០៩ ចាញ់ ៦-១ និងឆ្នាំ២០១៧ ចាញ់ ៤-១។

យ៉ាងណាមិញលោក Felix G.Dalmas គ្រូបង្វឹកក្រុមគោព្រៃកម្ពុជា បានអះអាងថា បាល់ទាត់អ្វីៗក៏អាចកើតឡើងបានដែរ ហើយកម្ពុជាបានត្រៀមខ្លួនជាស្រេច អមដោយក្ដីសង្ឃឹម និងឆន្ទៈដ៏មុតមាំ ដើម្បីដណ្ដើមជ័យជម្នះក្នុងការប្រកួតថ្ងៃនេះ ។ បន្ថែមលើនេះ លោកក៏បានបង្ហាញក្ដីរីករាយ ដែលបានជួបក្រុមមួយមានគ្រូមានបទពិសោធន៍ និងកីឡាករមានទេពកោសល្យនេះផងដែរ ។

Felix និយាយថា «យើងដឹងថា វៀតណាមបានប្ដេជ្ញាយកឈ្នះការប្រកួតថ្ងៃនេះ ដូច្នេះវាជាឱកាសល្អមួយ ដែលយើងត្រូវលេងជាមួយក្រុម ដែលមានកីឡាករមានទេពកោសល្យ និងគ្រូមានទពិសោធន៍ ។ ក្នុងបាល់ទាត់ គឺអ្វីៗអាចកើតឡើងទាំងអស់ ។ មិនមានមនុស្សច្រើនទេ ដែលជឿថា យើងអាចឡើងដល់វគ្គនេះ ហើយសម្រាប់ការប្រកួតថ្ងៃនេះក៏ដូចគ្នា អ្វីៗក៏អាចទៅរួចដែរ» ។

ដោយឡែកលោក Park Hang-Seo គ្រូបង្វឹកវៀតណាម បានទទួលស្គាល់ថា ការជួបកម្ពុជា មិនមែនជារឿងងាយស្រួលនោះទេ ។ លោកថា ការប្រកួតជាមួយកម្ពុជាថ្ងៃនេះ គឺជាជំនួបដ៏មានអត្ថន័យ ហើយក៏ជាប្រកួតលំបាកដែរ ។ ហេតុលដែលប្រកួតនេះមានន័យ ព្រោះបើយើងឈ្នះ យើងបានឡើងវគ្គផ្ដាច់ព្រ័ត្រ ។ ហើយវាជាការប្រកួតលំបាក ព្រោះកម្ពុជាលេងតិចជាងយើងក្នុងពូល ហើយពួកគេចំណេញបាន ១ថ្ងៃ ដើម្បីសម្រាក តែយើងនឹងប្រឹងប្រែងរាល់អ្វីៗទាំងអស់ សម្រាប់ការប្រកួតថ្ងៃនេះ» ។

បន្ថែមលើនេះ គ្រូបង្វឹកជនជាតិកូរ៉េខាងត្បូងដដែល ក៏បានបកស្រាយក្នុងសន្និសីទសារព័តមានមុនការប្រកួត កាលពីម្សិលមិញ អំពីការផ្ទុះព័ត៌មានអ្នកសារព័ត៌មានវៀតណាម លួចថតក្រុម U22 កម្ពុជាហ្វឹកហាត់ដែរថា «យើងគោរពក្រុមកម្ពុជា យើងមិនដែលបញ្ជូនក្រុមស៊ើបការណ៍ណាទៅយកព័ត៌មានពីក្រុមដទៃទេ ពួកយើងរវល់ជាមួយការងារយើង ដូច្នេះយើងមិនបានស៊ើបការណ៍ពីក្រុមកម្ពុជាទេ» ។ លើសពីនេះ លោកមិនលើកទឹកចិត្ត និងហាមដាច់ខាត រាល់អ្នកសារព័ត៌មានវៀតណាម ដែលធ្វើទង្វើគួរឲ្យអៀនខ្មាស់នេះ ។

គួរដឹងថា ការប្រកួតវគ្គពាក់កណ្ដាលផ្ដាច់ព្រ័ត្រថ្ងៃនេះមាន ២គូ ពោលគឺមុនឈានដល់ការប្រកួតរវាងកម្ពុជា និងវៀតណាម គឺក្រុម U22 មីយ៉ាន់ម៉ា ត្រូវជួបក្រុម U22 ឥណ្ឌូនេស៊ី ដើម្បីប្រជែងកៅអីវគ្គផ្ដាច់ព្រ័ត្រ ។ អ្វីដែលពិសេស គឺការប្រកួតវគ្គដ៏សំខាន់ ដែលជាកំណត់ត្រាប្រវត្តិសាស្ដ្ររបស់កម្ពុជានេះ នឹងមានផ្សាយបន្ដផ្ទាល់លើកញ្ចក់ទូរទស្សន៍ហង្សមាស៕