​ហ្វីលីពីនចេញមុខសុំទោស ​ក្រោយពី កម្ពុជា ថៃ ​មីយ៉ាន់ម៉ា ទីម័រ ​ជួប​បញ្ហា​​​ឡាន​យឺត ​អាហារ​អន់ ​សេវា​យ៉ាប់ នៃព្រឹត្តិការណ៍ស៊ីហ្គេម​

ហ្វីលីពីន ​ធ្វើ​ជា​ម្ចាស់​ផ្ទះ​ព្រឹត្តិការណ៍​ស៊ីហ្គេម ​នៅ​ឆ្នាំ​២០១៩​នេះ ​ហាក់​មិន​សម​ប្រកប​សោះ ​ដោយ​ទទួល​ពាក្យ​បណ្ដឹង​ច្រើន ទាក់ទង​ទៅ​នឹង​សេវា​នានា ​ជា​ពិសេស​វិញ្ញាសា​បាល់ទាត់​តែ​ម្ដង។

មាន​ប្រទេស​ដល់​ទៅ​៤​បាន​និយាយ​ពី​សេវា​កម្ម​របស់​ម្ចាស់​ផ្ទះ​នេះ ​ក្នុង​នោះ​មាន​កម្ពុជា ​ថៃ មីយ៉ាន់ម៉ា ​និង​ទីម័រ ​ដែល​សុទ្ធ​តែ​ជួប​បញ្ហា​ស្រដៀង​គ្នា​ទាំង​អស់។ ​ពួកគេ​សុទ្ធ​តែ​ជួប​បញ្ហា​ឡាន​ក្រុង​ទទួល​យឺត ​អាហារ​ផ្ដល់​ឱ្យ​មិន​ត្រឹម​ត្រូវ ​ញ៉ាំ​មិន​កើត ​ទីលាន​ហ្វឹកហាត់​ឆ្ងាយ​ពី​កន្លែង​ស្នាក់​នៅ ​ប្រើ​ពេល​យូរ​ទើប​ទៅ​ដល់។ ខណៈ​ដែល​ទីលាន​ប្រកួត​របស់​ក្រុម​ថៃ​វិញ​នោះ ​កំពុង​សាងសង់​នៅ​ឡើយ ​មិន​ទាន់​រួច​នោះ​ទេ។

ក្នុងនោះ​ គ្រូបង្វឹកក្រុមកម្ពុជា លោកFelix Dalmas បានប្រាប់សន្និសីទកាសែតកាលពីថ្ងៃអាទិត្យថា« យើងត្រូវរង់ចាំប្រហែលជា៨​ទៅ៩​ម៉ោង ដើម្បីទទួលឡាន​ក្រុងដឹកយើងទៅសណ្ឋាគារដែលយើងស្នាក់នៅ»។​

បញ្ហា​ទាំង​អស់​នេះ ​អាច​នឹង​ធ្វើ​ឱ្យ​ក្រុម​ទាំង​អស់​មិន​អាច​ត្រៀម​តាម​អ្វី​ដែល​គ្រោង​ទុក​បាន ព្រោះ​ពួកគេ​មិន​អាច​ប្រមូល​ផ្ដុំ​ហ្វឹកហាត់​និង​សម​ទីលាន​នោះ​ទេ។ ​ដោយ​ឡែក​ខាង​ហ្វីលីពីន​វិញ ​ក៏​ចេញ​មុខ​សុំទោស​ចំពោះ​រឿង​រ៉ាវ​ខាង​លើ​ផង​ដែរ៕

ប្រភព៖ Channel News Asia