តំបន់សម្បូរប្រេងនៅ​ស៊ីរី នឹង​ប្រើប្រាស់ជាមូលដ្ឋានទ័ពអាមេរិក​ ​ដើម្បីប្រយុទ្ធប្រឆាំងក្រុម ISIS
ព័ត៌មានអន្តរជាតិ
272

បរទេស៖ មន្ត្រីជាន់ខ្ពស់ក្រសួងការបរទេសអាមេរិក បាននិយាយនៅក្នុងសារព័ត៌មានថា តំបន់ប្រេងស្ថិតភាគឦសានប្រទេសស៊ីរី ដែលសហរដ្ឋអាមេរិកកំពុងការពារ នឹងត្រូវប្រើប្រាស់ជាមូលដ្ឋានសម្រាប់យោធាអាមេរិក ធ្វើប្រតិបត្តិការប្រឆាំងក្រុមសកម្មប្រយុទ្ធ ISIS។ នេះបើយោងតាមចេញផ្សាយពីសារព័ត៌មាន Sputnik នៅព្រឹកថ្ងៃព្រហស្បតិ៍ ទី០៧ ខែវិច្ឆិកា ឆ្នាំ២០១៩។

គួរជម្រាបថា​ នៅក្នុងសន្និសីទសារព័ត៌មានដ៏ខ្លីមួយនៅថ្ងៃពុធសប្ដាហ៍នេះ មន្ត្រីអាមេរិកដដែលបានគូសបញ្ជាក់ថា «ឈរនៅលើមូលដ្ឋានដើម្បីការពារសុវត្ថិភាព តំបន់ប្រេងនៃភាគឦសានប្រទេសស៊ីរីនឹងត្រូវប្រើប្រាស់ជាមូលដ្ឋានមួយ សម្រាប់ពួកយើងបន្តប្រតិបត្តិការប្រយុទ្ធប្រឆាំងនឹងពួក ISIS ដោយស្របច្បាប់»។

សូមបញ្ជាក់ថា កាលពីចុងខែតុលាកន្លងទៅ រដ្ឋមន្ត្រីការពារជាតិអាមេរិក លោក ម៉ាក អេស្ពើ (Mark Esper) បានអះអាងថា សហរដ្ឋអាមេរិកនឹងមិនអនុញ្ញាតឱ្យកងកម្លាំងរុស្ស៊ី និងរដ្ឋាភិបាលស៊ីរី ចូលទៅកាន់តំបន់ប្រេងនៅភាគឦសាននៃប្រទេស ដែលយោធាអាមេរិកកំពុងការពារនោះទេ។ ម្យ៉ាងវិញទៀត ទីភ្នាក់ងារព័ត៌មានតួកគីអាណាឌូលូ (Anadolu) ក៏បានរាយការណ៍ផងដែរថា យោធាអាមេរិកបាន និងកំពុងសាងសង់មូលដ្ឋានថ្មីចំនួនពីរ នៅតំបន់ដ៏សម្បូរប្រេងក្នុងខេត្ត ឌែរអ៊ែសហ្ស័រ (Deir ez-Zor)៕

ប្រភព៖ Sputnik