ទីក្រុងហុងកុង ព្រមានបរទេសកុំចូលជ្រៀតជ្រែក​ឲ្យសោះ ក្រោយក្រុមបាតុករសម្រុកទៅមុខកុងស៊ុលអាមេរិក​
ព័ត៌មានអន្តរជាតិ
813

​បរទេស៖ យោងតាមការចេញពីសារព័ត៌មាន Channel News Asia នៅល្ងាចថ្ងៃទី០៩ ខែកញ្ញា ឆ្នាំ២០១៩ បានឲ្យដឹងថា ​រដ្ឋាភិបាលទីក្រុងហុងកុងបានចេញមុខព្រមាន ទៅនឹងការលូកដៃចូលជ្រៀកជ្រែតពីបរទេស ក្រោយក្រុមបាតុករទើបតែនាំគ្នាដង្ហែរក្បួនតវ៉ា ទៅដល់ស្ថានកុងស៊ុលអាមេរិក និងប្រកូកប្រកាសសុំការជួយជ្រោមជ្រែង ពីទីក្រុងវ៉ាស៊ីនតោន។​

គួរបញ្ជាក់ថា នាថ្ងៃចន្ទនេះអ្នកនាំពាក្យរដ្ឋបាលពិសេសហុងកុង បានព្រមានប្រឆាំង ចំពោះការចង់លូកដៃពីបរទេសមកក្នុងបញ្ហាក្រុងហុងកុង ខណៈកាលពីថ្ងៃអាទិត្យ ក្រុមបាតុករបានប្រមូលផ្តុំគ្នា នៅពីមុខស្ថានកុងស៊ុលអាមេរិកប្រចាំហុងកុង ដើម្បីគាំទ្រឲ្យសភាអាមេរិកអនុម័តច្បាប់មួយ ពាក់ព័ន្ធបញ្ហាសិទ្ធិមនុស្សនៅទីក្រុងហុងកុង និងបានស្នើឲ្យប្រធានាធិបតីអាមេរិកលោក ដូណាល់ ត្រាំ មកជួយរំដោះទីក្រុងស្វយ័តរបស់ចិននេះថែមទៀតផង។

ក្នុងនោះ រដ្ឋបាលទីក្រុងហុងកុងបានថ្កោលទោស ចំពោះទង្វើលក្ខណៈជ្រុលនិយម របស់ក្រុមបាតុករដែលបានវាយបំផ្លាញ ទ្រព្យសម្បត្តិសាធារណៈ ដុតភ្លើង និងបិទច្រកផ្លូវ នៅស្ថានីយរថភ្លើងមួយកន្លែងផងដែរកាលពីម្សិលមិញនេះ ដែលជាសប្តាហ៍ទី ១៤ហើយ នៃចលនាបាតុកម្មនៅហុងកុង។

លើសពីនេះទៅទៀត ក្រោយពីក្រុមបាតុករបានទៅប្រកូកប្រកាស សុំការជួយជ្រោមជ្រែងពីអាមេរិក ស្ថាប័នសារព័ត៌មាននៃរដ្ឋាភិបាលចិន នាថ្ងៃចន្ទនេះបានព្រមានថា ទីក្រុងហុងកុងគឺជាដែនដី ដែលមិនអាចកាត់ផ្តាច់បានជាដាច់ខាតរបស់ចិន ហើយចលានាចង់បំបែករដ្ឋក្នុងទម្រង់ណាមួយ នឹងកម្ទេចចោលដោយគ្មានការអត់ឱនឡើយ៕

ប្រភព៖ Channel News Asia