Liverpool លើ​ក​ពាន​Super Cup ជា​លើក​ទី៤ ក្រោយ​យកឈ្នះ​Chelsea

Liverpool បានឈ្នះ​ពាន​ UEFA Super Cup ជា​លើក​ទី៤ ក្នុង​ប្រវត្តិសាស្រ្ដ​របស់​ខ្លួន ក្រោយ​យកឈ្នះ Chelsea ដោយ​បាល់ប៉េណាល់ទី​កាត់សេចក្ដី ៥-៤។

គួរជម្រាបថា ក្នុង​ការប្រកួត​ ៩០នាទី ក្រុមទាំង​២​បញ្ចប់​ទៅ​ដោយ​លទ្ធផល​ស្មើគ្នា​១-១។ ក្នុងមោះក្រុមChelsea ជា​អ្នក​បំប៉ោង​សំណាញ់ទីមុន ដោយកីឡាករOlivier Giroud នៅ​នាទី​៣៦ ខណៈដែល​Sadio Mane ស៊ុត​ឲ្យហង្ស​ក្រហម តាម​ស្មើ​វិញ​នៅនាទី​៤៨។ ឈាន​ចូល​ម៉ោង​បន្ថែម ១៥នាទី២ដង កីឡាករMane​បាន​បន្ថែម​១គ្រាប់​ទៀត​ នៅនាទី​៩៥ ប៉ុន្តែ​ Jorginho បាន​ស៊ុត​បាល់​ពិន័យ ១១ម៉ែត្រ ឲ្យ​តោខៀវ​តាមស្មើ នៅនាទី ១០១។

ឈាន​ដល់​វគ្គ​ប៉េណាល់ទីកាត់សេចក្ដី Liverpool បាន​ស៊ុតបញ្ចូលទីទាំង ៥គ្រាប់ ដោយ Roberto Firmino, Fabinho, Divock Origi, Trent Alexander-Arnold និង Mohamed Salah។ ចំណែក​ Chelsea ស៊ុត​ចូល ៤ Jorginho, Ross Barkley, Mason Mount និង Emerson។ កីឡាករ​ដែល​ទាត់​មិន​ចូល គឺ Tammy Abraham។

យ៉ាងណាមិញ​ក្រុម​របស់​លោក Klopp ក៏​ឈោង​បាន​កំណត់ត្រា​ថ្មី​មួយ ដោយ​វា​ជា​ពាន Super Cup លើក​ទី ៤ ហើយ​ក្នុង​ប្រវត្តិសាស្រ្ត ពោល​គឺ​នៅ​ចាញ់​តែ​ក្លឹប​ពីរ​ផ្សេង​ទៀត​ប៉ុណ្ណោះ​រួម​មាន FC Barcelona និង AC Milanដែល​ជោគជ័យ​បាន ៥ លើក៕