មន្ត្រីកាំកុងត្រូលខេត្តស្វាយរៀង ចុះពិនិត្យ និងរកឃើញទំនិញខូចគុណភាពជាច្រើនមុខ នៅផ្សារតាពៅក្រុងបាវិត ដកហូតដុតកម្ទេចចោល!
ព័ត៌មាន
276

ស្វាយរៀង៖ នៅព្រឹកថ្ងៃទី១៦ ខែឧសភា ឆ្នាំ២០១៩នេះ សាខាកាំកុងត្រូលខេត្តស្វាយរៀង បានចុះពិនិត្យមុខទំនិញជាច្រើនមុខ នៅក្នុងផ្សារតាពៅ ក្រុងបាវិត ដោយរកឃើញទំនិញខូចគុណភាពជាច្រើនមុខ ហើយត្រូវបានមន្ត្រីជំនាញបានដកហូតយកទៅដុតកម្ទេចចោល។

មន្ត្រីកាំកុងត្រូលបានឲ្យដឹងថា ដោយមានការណែនាំពីលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោក ម៉ក់ ពេជ្ជរិទ្ធ ប្រតិភូរាជរដ្ឋាភិបាលទទួលបន្ទុកជាអគ្គនាយកកាំកុងត្រូល សាខាកាំកុងត្រូលខេត្តស្វាយរៀង តែងតែចុះពិនិត្យមុខទំនិញបានជាច្រើនលើក ហើយការចុះពិនិត្យមុខទំនិញនៅថ្ងៃនេះ ក្នុងគោលបំណងធានាបានសុវត្ថិភាពម្ហូបអាហារ ព្រោះវាមានសារសំខាន់ ចាំបាច់ណាស់ក្នុងសង្គម និងជីវភាពប្រចាំថ្ងៃ។

មន្ត្រីកាំកុងត្រូលខេត្តស្វាយរៀង បានបន្តទៀតថា ការទទួលខុសត្រូវលើសុវត្ថិភាពម្ហូបអាហារ គឺជាការទទួលខុសត្រូវរួមគ្នាទាំងស្ថាប័នជំនាញ ទាំងអ្នកនាំចូល អ្នកផលិត អ្នកចែកចាយ និងអ្នកទាំងអស់គ្នា ជាអ្នកប្រើប្រាស់ផងដែរ ព្រោះសុខភាព គឺជាកត្តាចំបង នៃភាពរស់រាននៃជីវិត។

ជាមួយគ្នានោះ មន្ត្រីជំនាញ បានអំពាវដល់ប្រជាពលរដ្ឋទាំងអស់នៅខេត្តស្វាយរៀង សូមមានការប្រយ័ត្ន ចំពោះការបរិភោគចំណីអាហារ ត្រូវពិនិត្យមើលស្លាកសញ្ញាកាលបរិច្ឆេទ ឲ្យបានច្បាស់លាស់ មុននឹងទិញយកទៅបរិភោគ៕