ស្លាប់រាល់ថ្ងៃ! គ្រោះថ្នាក់ចរាចរណ៍ទូទាំងប្រទេស ថ្ងៃទី១១ ខែមេសា បណ្តាលឲ្យមនុស្ស ៦នាក់ស្លាប់ និង ១៩នាក់ របួសធ្ងន់ស្រាល
ព័ត៌មាន
700

ភ្នំពេញ៖ យោងតាមរបាយការណ៍ ពីនាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ ឲ្យដឹងថា មានករណីគ្រោះថ្នាក់ចរាចរណ៍ នៅទូទាំងប្រទេសនៅថ្ងៃទី១១ ខែមេសា ឆ្នាំ២០១៩ កើតឡើង ចំនួន១០លើក បង្កឲ្យមនុស្សស្លាប់៦នាក់, របួសស្រាល១០នាក់ និងរបួសធ្ងន់៩នាក់។

ប្រភពព័ត៌មានដដែលបញ្ជាក់ថា នៅក្នុងហេតុការណ៍ គ្រោះថ្នាក់ចរាចរណ៍ទាំង១០លើកនេះ បណ្ដាលឲ្យខូតខាតម៉ូតូ១៤គ្រឿង, រថយន្តតូច៥គ្រឿង និងរថយន្ដធំ១គ្រឿង ហើយមូលហេតុដែលបណ្ដាលឲ្យកើត មានគ្រោះថ្នាក់ចរាចរណ៍រួមមាន៖ ល្បឿន, មិនគោរពសិទ្ធ, មិនប្រកាន់ស្ដាំ, និងប្រជែង។

សូមបញ្ជាក់ថា រយៈពេល១១ថ្ងៃ ចាប់ពីថ្ងៃទី០១ ដល់ថ្ងៃទី១១ ខែមេសា ឆ្នាំ២០១៩នេះ មានករណីគ្រោះថ្នាក់ចរាចរណ៍កើតឡើង១៣៤លើក, បណ្ដាលឲ្យមនុស្សស្លាប់ចំនួន៧៣នាក់ របួសធ្ងន់១៣៤នាក់ និងរបួសស្រាល៥៤នាក់៕