សម្ដេចតេជោ ហ៊ុន សែន នាយករដ្ឋមន្ដ្រី បញ្ជាផ្ទាល់មាត់ នៅតាមច្រកទ្វារព្រំដែនអន្ដរជាតិទូទាំងប្រទេស គឺទុកតែខាងគយ និងនគរបាលអន្តោប្រវេសន៍ ក្រៅពីនោះដកខ្លួនចេញ
ព័ត៌មាន
1.99K

ភ្នំពេញ៖ ចាប់ពីពេលនេះតទៅ នៅតាមច្រកទ្វារព្រំដែនអន្ដរជាតិទូទាំងប្រទេស មន្ដ្រីដែលត្រូវដាក់ប្រចាំការស្របច្បាប់ គឺមានតែមន្ដ្រីនគរបាលអន្ដោប្រវេសន៍ និងមន្ដ្រីគយតែប៉ុណ្ណោះ ក្រៅពីនេះត្រូវបញ្ជាឲ្យដកចេញ។

នេះជាបទបញ្ជាផ្ទាល់មាត់របស់នាយករដ្ឋមន្ដ្រី សម្ដេចតេជោ ហ៊ុន សែន ដែលបានប្រកាសចេញនៅចំពោះមុខអ្នកសារព័ត៌មានជិត៥,០០០នាក់ កាលពីល្ងាចថ្ងៃទី១១ ខែមករា ឆ្នាំ២០១៩ ក្នុងជំនួបប្រចាំលើកទី៣ រវាងនាយករដ្ឋមន្ដ្រី និងអ្នកកាសែតនៅកម្ពុជា។

ក្រៅពីការលើកឡើងបញ្ហាទាំងឡាយ ពាក់ព័ន្ធក្នុងវិស័យសារព័ត៌មាន សម្ដេចតេជោ ហ៊ុន សែន ក៏បានឆ្លៀតពីដំណោះស្រាយទាក់ទិននឹងមន្ដ្រីយាមប្រចាំការ តាមច្រកទ្វារព្រំដែនផងដែរ ដោយបញ្ជាឲ្យដកស្ថាប័នទាំងឡាយ ចេញពីច្រកទ្វារព្រំដែនទុកតែមន្ដ្រីនគរបាលអន្ដោប្រវេសន៍ និងមន្ដ្រីគយតែប៉ុណ្ណោះ ដែលពាក់ព័ន្ធនឹងការវាយត្រា ក៏ដូចជា ការត្រួតពិនិត្យលិខិតឆ្លងដែនចេញ-ចូល របស់ភ្ញៀវជាតិ និងអន្ដរជាតិ ព្រមទាំងការយកពន្ធពីការដឹកទំនិញឆ្លងកាត់។

ក្រោយបទបញ្ជានាយករដ្ឋមន្ដ្រីមជ្ឈដ្ឋានមួយចំនួន​ចង់ដឹងថា តើនៅតាមច្រកទ្វារព្រំដែននៅទូទាំងប្រទេស មានស្ថាប័នអ្វីខ្លះនៅប្រចាំការរួមគ្នានោះ?

យោងតាមការសាកសួរព័ត៌មាន​ ពីសមត្ថកិច្ចពាក់ព័ន្ធក្នុងនោះ មានទាំងមន្ដ្រីនគរបាលអន្ដោប្រវេសន៍ បានប្រាប់មកកាន់បណ្ដាញព័ត៌មាន នៅព្រឹកថ្ងៃទី១២ ខែមករាឲ្យដឹងថា បច្ចុប្បន្ននេះក្រុមមន្ដ្រីដែលត្រូវបានដាក់ប្រចាំការ នៅតាមច្រកទ្វារព្រំដែនអន្ដរជាតិ រួមមាន៖

*ទី១៖ ប្រធានទីស្នាក់ការ (ជាមន្ដ្រីរបស់សាលាខេត្ដ) ជាប្រធាន

*ទី២៖ មន្ដ្រីនគរបាលអន្ដោប្រវេសន៍ នៃអគ្គនាយកដ្ឋានអន្ដោប្រវេសន៍ ជាអនុប្រធាន

*ទី៣៖ មន្រ្ដីគយ និងរដ្ឋាករ​

*ទី៤៖ មន្ដ្រីកាំកុងត្រូល នៃអគ្គនាយកដ្ឋានកាំកុងត្រូល ក្រសួងពាណិជ្ជកម្ម

*ទី៥៖ មន្ដ្រីយោធាទំនាក់ទំនងព្រំដែន នៃអគ្គបញ្ជាការ

*ទី៦៖ មន្ដ្រីចតាឡីស័ក (មន្ដ្រីពិនិត្យលើជំងឺឆ្លង) របស់មន្ទីរសុខាភិបាលខេត្ត នៃក្រសួងសុខាភិបាល

*ទី៧៖ មន្ដ្រីនគរបាលបង្ក្រាបគ្រឿងញៀនតាមព្រំដែន BLO ជាដើម។

មជ្ឈដ្ឋានទាំងនេះមានជំនឿមុតមាំថា ស្ថាប័នពាក់ព័ន្ធដែលត្រូវបាននាយករដ្ឋមន្ដ្រី បញ្ជាឲ្យដកចេញនោះ នឹងគោរពយ៉ាងមានប្រសិទ្ធភាព ដើម្បីកាត់បន្ថយភាពអសកម្មមួយចំនួន និងឧបសគ្គទាំងឡាយ ដែលរំខានដល់ភ្ញៀវទេសចរជាតិ-អន្ដរជាតិ ប្រជាពលរដ្ឋ និងអ្នករកស៊ីនាំទំនិញឆ្លងកាត់ជាដើម។

នៅចំពោះមុខអ្នកសារព័ត៌មាន ប្រមុខនៃរាជរដ្ឋាភិបាល សម្តេចតេជោ ហ៊ុន សែន បានថ្លែងទាក់ទិនត្រង់ចំណុចនេះ យ៉ាងដូច្នេះថា «ខ្ញុំបានសម្រេចអម្បិញមិញ មាត់ច្រកនៅតាមមាត់ច្រក តាមព្រំដែន​ក្នុងការនាំចេញនាំចូល អត់មានតម្រូវស្ថាប័នណាក្រៅតែពី ​អន្ដោប្រវេសន៍ និងគយ មានតែ២នេះ ក្រៅពីនោះដកចេញឲ្យអស់​ ទាំងអាកាំកុងត្រូល ទាំងស្អីដកចេញឲ្យអស់។ អាហ្នឹងវាកើតទៅជាឧបសគ្គ នៃការរារាំងការធ្វើពាណិជ្ជកម្មទៅវិញទេ។ ចឹងបើទុកវានាំតែខាតដដែល ឲ្យវាចេញមកទុកតែ ប៉ូលីសអន្ដោប្រវេសន៍ អាហ្នឹងវាត្រូវវៃត្រា និងគយបានហើយ»៕